【娛樂人物】入行16年慳到盡沈卓盈離巢訴苦:表面風光

0 12

靠金牛壓袋

沈大師過去多年演過《結.分@謊情式》、《賭城群英會》、《平安谷之詭谷傳說》及《特技人》等超過40套劇集,知名度雖然得以提高,但她並不覺得活得風光,她說:「我諗冇人覺得做娛樂圈係風光,都係表面風光,有苦自己知。」她表示入行後,一直做慳妹,出入只搭公共交通工具,每天兩個包充飢:「平時買定兩個包放喺袋,朝早食一個,晏晝食一個。因為趕時間,我會一路搭車,一路食,冇人認得,我都唔介意,我咬住啖包覺得好好味。」

可能不少人會替沈大師感到可憐,她卻自得其樂:「我又唔係咁諗,我鍾意食包,我鍾意食腸仔包、煙肉包、吞拿魚包,所以我唔覺得捱苦,我好享受喎。收工我又坐番城巴,再轉通宵車,唔會立亂嘥錢搭的士。」

回想首天返電視台開工,沈大師笑說爸爸給她一張金牛「壓袋」:「當時我見到一千蚊覺得好多錢,因為做學生,每星期嘅零用包搭車、早午餐同買文具,每個禮拜都只係二百蚊。我好感動,就拎住呢張金牛去返工,我同自己講唔可以亂咁使錢,因為屋企人賺錢好辛苦。」

沈大師自豪用父親給予的一千元起家,她說:「當年都冇諗過要將呢一千蚊點樣變好多錢,只係諗要好好善用。我呢樣嘢要讚一讚自己,爸爸喺我出道畀過一千蚊我,自此我冇問家人拎過錢,對我嚟講,唔係要屋企人畀好多嘢我,反而係我可以畀到乜嘢屋企人。」她表示由第一個月出糧開始,就開始將人工分一半做家用。

相關新聞:【選美入行】「沈大師」源自股評人

 

 

https://hk.entertainment.appledaily.com/daily/entertainment/

訂閱我們的新聞
在此處註冊以獲取最新消息,更新和特別優惠直接發送到您的收件箱。
您可以隨時取消訂閱